গুৱাহাটী মহানগৰীত সঘনাই হৈ থকা বানপানী তথা অন্যান্য সমস্যাক লৈ সৰৱ হৈ পৰিছে অসম প্ৰদেশ কংগ্ৰেছ দল। গুৱাহাটী মহানগৰীৰ উন্নয়নৰ নামত কংগ্ৰেছ দলটোৱে কেৱল দুৰ্নীতি সংঘটিত হৈ আহিছে বুলি অভিযোগ উত্থাপন কৰিছে। বুধবাৰে ৰাজীৱ ভৱনত সংবাদ মেলৰ আয়োজন কৰি কংগ্ৰেছ দলটোৱে গুৱাহাটীৰ উন্নয়নৰ নামত ৮০২ কোটি টকাৰ কেলেংকাৰী হোৱা বুলি গুৰুতৰ অভিযোগ উত্থাপন কৰে। স্মাৰ্ট চহৰৰ নামত ৮০২ কোটি টকা ব্যয় কৰাৰ পাছতো মহানগৰৰ সমস্যাৰ তিলমানো সমাধান নোহোৱাৰ কথা উল্লেখ কৰি মহিলা কংগ্ৰেছৰ সভানেত্ৰী মীৰা বৰঠাকুৰ আৰু মিডিয়া অধ্যক্ষ বেদব্ৰত বৰাই কেতবোৰ গুৰুতৰ প্ৰশ্ন কৰে।
গুৱাহাটীৰ কৃত্ৰিম বানত গাড়ী আৰু আন সম্পত্তি নষ্ট হোৱা লোকসকলক ক্ষতিপূৰণ দিবলৈ দাবী জনাইছে অসম প্ৰদেশ কংগ্ৰেছে। গুৱাহাটীত বানত অৱৰুদ্ধ হৈ থকাৰ সময়ত মুখ্যমন্ত্ৰী আৰু সকলো মন্ত্ৰী পৰিষদে এচি ৰুমত বহি দলীয় পৰ্যালোচনা কৰি থকাৰ বাদে বানত ককবকাই থকা লোকক উদ্ধাৰৰ কোনো ব্যৱস্থা কৰা নাছিল। মহিলা কংগ্ৰেছৰ সভানেত্ৰী মীৰা বৰঠাকুৰ আৰু কংগ্ৰেছৰ মিডিয়া অধ্যক্ষ বেদব্ৰত বৰাই এক সংবাদমেলযোগে ৮০২ কোটি টকা স্মাৰ্ট চিটীৰ নামত ব্যয় কৰাৰ ৮ বছৰ পিছতো গুৱাহাটীৰ মানুহৰ বুনিয়াদী সমস্যা কিয় সমাধান নহ’ল বুলি প্ৰশ্ন কৰে।
২০১৬ চনত প্ৰধানমন্ত্ৰীয়ে স্মাৰ্ট চিটি ঘোষণা কৰা অসমত এতিয়ালৈকে ১৪টা প্ৰকল্পৰ নামত ৮০২ কোটি টকা ব্যয় কৰা হৈছে। ব্ৰহ্মপুত্ৰৰ পাৰৰ সৌন্দৰ্য বৰ্ধনৰ নামত ৩২৭.৩০ কোটি, ২০০খন ইলেকট্ৰিক বাছ ক্ৰয়ৰ নামত ২৬০.৭৭ কোটি, ট্ৰেফিক মেনেজমেণ্ট ছিষ্টেমৰ নামত ৭৮.৪৪ কোটি, এলইডি লাইটৰ নামত ২৩ কোটি, জ্যোতি প্ৰকল্পত ১৪.৫৭ কোটি, দক্ষিণপাটসত্ৰ উন্নয়নৰ নামত ১৪.৩২ কোটি, উমানন্দ মন্দিৰৰ উন্নয়নৰ নামত ১৪.২ কোটি, অশ্বক্লান্ত দেৱালয় উন্নয়নৰ নামত ১০.৮২ কোটি, কলাক্ষেত্ৰত লাইট এণ্ড ছাউণ্ড শ্ব’ৰ নামত ৮.২৮ কোটি, কলাক্ষেত্ৰৰ সৌন্দৰ্যবৰ্ধনৰ নামত ৪.৯৬ কোটি, গান্ধী মণ্ডপৰ উন্নয়নৰ নামত ১১ কোটি, ১০০খন চিএনজি বাছ ক্ৰয়ৰ নামত ২৯ কোটি আৰু জজ ফিল্ড উন্নয়নৰ নামত ৫.৬৬ কোটি টকা ইতিমধ্যে ব্যয় কৰা হৈছে। ১৪টা প্ৰকল্পৰ নামত ব্যয় কৰা এই ৮০২.৩৩ কোটি টকা কোন বিভাগে কেনেকৈ ব্যয় কৰিলে তাৰ এক শ্বেতপত্ৰ প্ৰকাশৰ বাবে কংগ্ৰেছ দলটোৱে দাবী জনায়।
নগৰ উন্নয়ন মন্ত্ৰী অশোক সিংহলে নিজৰ প্ৰ’টেক কোম্পানীৰ নামত গৃহ নিৰ্মাণৰ সকলো নীতি-নিয়ম ভংগ কৰা বুলি অভিযোগ কৰিছে মহিলা কংগ্ৰেছৰ সভানেত্ৰী মীৰা বৰঠাকুৰে। গুৱাহাটী তৰুণ নগৰৰ আনে অনুমতি নোপোৱা দ’ এলেকাত মন্ত্ৰী সিংহলৰ পৃষ্ঠপোষকতাত প্ৰ’টেক গ্ৰুপে ১৭ মহলীয়া অট্টালিকা নিৰ্মাণ কৰা বুলি অভিযোগ কৰি মীৰা বৰঠাকুৰে কয় যে এন ব্যৱসায়ী মানুহক গুৱাহাটী উন্নয়নৰ দৰে গুৰুত্বপূৰ্ণ বিভাগ অৰ্পণ কৰি গুৱাহাটীবাসীক মুখ্যমন্ত্ৰীয়ে অপমানিত কৰিছে।
শিলসাঁকোত উচ্ছেদ কৰাৰ পিছতো পানী কিয় কমা নাই বুলি প্ৰশ্ন কৰি মীৰা বৰঠাকুৰে কয় যে পানীৰ ৰং ৰঙা-ক’লা কৰি সমগ্ৰ ইছ্যুটোক বিভাগীয় মন্ত্ৰীজনে অন্যফালে নিব খুজিছে। মন্ত্ৰী অশোক সিংহলৰ গুৱাহাটী উন্নয়ন সন্দৰ্ভত কোনো দক্ষতা নাই বুলি উল্লেখ কৰি মহিলা কংগ্ৰেছৰ নেত্ৰীগৰাকীয়ে কয় যে গড়কাপ্তানি বিভাগ, পৌৰ নিগম আৰু জনস্বাস্থ্য বিভাগৰ মাজত সু-সমন্বয়ৰ অভাৱৰ বাবেই নলাসমূহ খন্দা আৰু পোতাত বেমেজালিৰ সৃষ্টি হৈছে। পানী ক’লা হৈ পৰা ড্ৰেইনসমূহে প্ৰমাণ কৰিছে যে দীৰ্ঘদিন ধৰি সেইসমূহ পৰিস্কাৰ কৰা হোৱা নাই আৰু ইয়াৰ বিপৰীতে মন্ত্ৰীৰ পৃষ্ঠপোষকতাত ছুপাৰ ছাকাৰ ক্ৰয় কৰি ৰাইজৰ কৰ-কাটলৰ পৰা সংগ্ৰহ হোৱা পুঁজিৰ অপব্যয় কৰিছে।
গুৱাহাটী পৌৰনিগমৰ নিৰ্বাচনৰ সময়ত বানমুক্ত গুৱাহাটী কৰাৰ লগতে সকলোকে ঘৰে ঘৰে খোৱাপানী যোগান ধৰিব বুলি ঘোষণা কৰা বিজেপি দল আৰু চৰকাৰে শাসন লাভ কৰাৰ পিছত সাধাৰণ ৰাইজৰ ফালে পিঠি দিয়াৰ অভিযোগ কৰে।
