মিচিং ৰাইজৰ দীৰ্ঘদিনীয়া দাবীৰ প্ৰতি সঁহাৰি জনাই অসম ৰাজ্যিক কেবিনেটৰ বৈঠকত মঙলবাৰে অসমৰ দ্বিতীয় বৃহৎ জনগোষ্ঠী মিচিংসকলৰ ‘আলি-আয়ে লৃগাং’ উৎসৱৰ দিনটোক ৰাজ্যিক বন্ধ হিচাপে ঘোষণা কৰে । অসম চৰকাৰৰ এই সিদ্ধান্তক উষ্ম আদৰণি জনাইছে মিচিং ৰাইজে। সুদীৰ্ঘ প্ৰায় ৪৫ বছৰৰ অপেক্ষাৰ অন্তত ১০ মাৰ্চ, ২০২৬ তাৰিখে মিচিং জনগোষ্ঠীৰ প্ৰাণৰ উৎসৱ আলি-আয়ে-লৃগাঙৰ ৰাজ্যিক বন্ধ দাবীৰ সফল ৰূপ লাভ কৰিবলৈ সক্ষম হৈছে । এই ঐতিহাসিক সিদ্ধান্ত মিচিং সম্প্ৰদায়ৰ বাবে এক গৌৰৱ আৰু আনন্দৰ মুহূৰ্ত ।
এই সন্দৰ্ভত মিচিং জাতীয় সংগঠনৰ নেতাই কয় যে, “মিচিং জনগোষ্ঠীৰ আটাইতকৈ আনন্দৰ খবৰ যে অসম চৰকাৰৰ ৰাজ্যিক কেবিনেটে মিচিং জনগোষ্ঠীৰ আলি-আয়ে-লৃগাং কৃষিভিত্তিক উৎসৱৰ দিনটোক ৰাজ্যিক বন্ধ হিচাপে স্বীকৃতি প্ৰদান কৰিলে । তাৰ কাৰণে অসমৰ মুখ্যমন্ত্ৰী মাননীয় ডঃ হিমন্ত বিশ্ব শৰ্মা নেতৃত্বাধীন অসম চৰকাৰখনক আমি আন্তৰিক ধন্যবাদ জ্ঞাপন কৰিছোঁ ।”
