গোৱালপাৰাৰ মাটিয়াত এখনি ব্যতিক্রমী বিয়া। দুডাল গছৰ মাজৰ বিবাহ চাবলৈ পাই আনন্দত মতলীয়া আবাল-বৃদ্ধ-বনিতা।
গোৱালপাৰাত বট আৰু আহঁত গছৰ মাজত বিয়াৰ আয়োজন কৰে গুণীয়ালগুৰীৰ হিন্দু ধৰ্মাৱলম্বী ৰাইজে। পবিত্ৰ শাওণ মাহৰ শুভক্ষণত কুৰিটা বৰ্ষ গৰকা গোৱালপাৰাৰ গুণীয়ালগুৰীৰ শ্ৰী শ্ৰী মা দক্ষিণা কালি মন্দিৰৰ দুডাল বট আৰু আহঁত গছৰ মাজত ৰাইজে সম্পন্ন কৰে বিবাহ কাৰ্যসূচী। দৰা বট গছৰ বিপৰীতে কইনাৰ সাজত আহঁত।
আজি শাওণৰ চতুৰ্থ তথা শেষৰটো সোমবাৰ। সেই উপলক্ষে আহঁত আৰু বট ৰ বিবাহৰ বাবে উৎফুল্লিত গুণীয়ালগুৰী তথা অঞ্চলবাসী ৰাইজ। কঁকাল ভাগি নাচি বাগি আত্মহাৰা ডেকা-গাভৰুকে ধৰি, বোৱাৰী, বৃদ্ধা আইতা। কঁকালত কলহ লৈ পানী তুলি দৰা-কইনাক নোৱাই-ধুৱাই ন-বস্ত্ৰ পৰিধান কৰাই পুৰুহিতৰ মন্ত্ৰস্বাৰণেৰে বিবাহ সম্পন্ন কৰা হয় বহু পুৰণি দুই গছজোপাৰ। আয়োতিৰ উৰুলিৰে মুখৰিত গুণীয়ালগুৰীৰ শ্ৰী শ্ৰী মা দক্ষিণা কালি মন্দিৰত।
