শীতকালৰ আগমনৰ লগে লগে আমাৰ দৈনন্দিন জীৱনশৈলীত যথেষ্ট পৰিৱৰ্তন আহে। এই বতৰত প্ৰতিদিনে গা ধোৱাটো প্ৰয়োজনীয় নে নহয়, সেই লৈ বহুতৰে মনত প্ৰশ্ন উদয় হয়। বহু লোকে পৰিষ্কাৰ হৈ থাকিবলৈ বৰষুণ বা ঠাণ্ডাৰ মাজতো দৈনিক গা ধোৱে, আনহাতে একাংশই অত্যধিক ঠাণ্ডাৰ বাবে গা ধোৱাৰ পৰা বিৰত থাকে। বিশেষজ্ঞসকলৰ মতে, শীতকালত গা ধোৱাৰ ক্ষেত্ৰত কিছু সাৱধানতা অৱলম্বন কৰাটো অতি জৰুৰী কাৰণ এই বতৰত আমাৰ ছালখন স্বাভাৱিকতকৈ অধিক সংবেদনশীল হৈ থাকে।
এই সময়ত আটাইতকৈ গুৰুত্বপূৰ্ণ বিষয়টো হ’ল পানীৰ উষ্ণতা। শীতৰ প্ৰকোপৰ পৰা ৰক্ষা পাবলৈ বহুতে অতিপাত গৰম পানীৰে গা ধোৱাৰ অভ্যাস কৰে। কিন্তু আয়ুৰ্বেদ আৰু চিকিৎসা বিজ্ঞান দুয়োৰে মতে, অত্যধিক গৰম পানী শৰীৰৰ বাবে ক্ষতিকাৰক হ’ব পাৰে। গৰম পানীয়ে ছালৰ প্ৰাকৃতিক আৰ্দ্ৰতা আৰু তেলীয়া ভাব আঁতৰাই পেলায়, যাৰ ফলত ছালখন শুকান আৰু খহটা হৈ পৰে। ইয়াৰ উপৰিও অতি গৰম পানী ব্যৱহাৰ কৰিলে ছালত খজুৱতি বা একজিমাৰ দৰে সমস্যাই দেখা দিব পাৰে। সেয়েহে গা ধুবলৈ সদায় কুহুমীয়া পানী ব্যৱহাৰ কৰাটোৱে আটাইতকৈ উত্তম উপায়।
চিকিৎসকৰ মতে কুহুমীয়া পানীৰে গা ধুলে শৰীৰৰ তেজৰ সঞ্চালন উন্নত হয় আৰু শৰীৰটো ভালদৰে পৰিষ্কাৰ হয়। ইয়াৰ বিপৰীতে অত্যধিক গৰম পানী চুলিৰ বাবেও অপকাৰী। গৰম পানীৰ সংস্পৰ্শত চুলিবোৰ অতিমাত্ৰা শুকান আৰু ৰুক্ষ হৈ পৰে। মন কৰিবলগীয়া যে আমাৰ ছালত কিছুমান উপকাৰী বেক্টেৰিয়া থাকে যিবোৰে আমাক বিভিন্ন সংক্ৰমণৰ পৰা ৰক্ষা কৰে। কিন্তু দৈনিক অত্যধিক সময় ধৰি গা ধোৱা বা কড়া চাবোন ব্যৱহাৰ কৰিলে এই সুৰক্ষা তৰপটো দুৰ্বল হৈ পৰে, যাৰ ফলত ছালৰ বিভিন্ন ৰোগ হোৱাৰ সম্ভাৱনা বৃদ্ধি পায়।
শীতকালত ধূলি-বালি আৰু প্ৰদূষণৰ পৰা মুক্ত হবলৈ গা ধোৱাটো প্ৰয়োজনীয় যদিও ইয়াৰ অৰ্থ এইটো নহয় যে প্ৰতিদিনে দীৰ্ঘসময় ধৰি গা ধুবই লাগিব। যদি কাৰোবাৰ ছাল অতিপাত শুকান, তেন্তে তেওঁলোকে এদিন এৰি এদিন গা ধুব পাৰে। যিদিনা গা ধোৱা নহয়, সিদিনা শৰীৰৰ বেছি ঘাম ওলোৱা অংশবোৰ যেনে মুখ, ভৰি বা বাহুৰ তলৰ অংশ ভালদৰে পৰিষ্কাৰ কৰি ৰখা উচিত। গা ধোৱাৰ ঠিক পাছতেই ছালৰ আৰ্দ্ৰতা ধৰি ৰাখিবলৈ মইশ্ব’ৰাইজাৰ, বডি লোচন বা তেল ব্যৱহাৰ কৰাটো অতি জৰুৰী। এনেবোৰ সৰু সৰু সাৱধানতাই আপোনাক শীতৰ দিনতো সুস্থ আৰু সতেজ কৰি ৰাখিব।
