২৭ আগষ্টৰ পৰা কাৰ্যকৰী হ’ব আমেৰিকাৰ ৰাষ্ট্ৰপতি ড’নাল্ড ট্ৰাম্প ভাৰতৰ ওপৰত আৰোপ কৰা শুল্ক। ৰাষ্ট্ৰপতি ড’নাল্ড ট্ৰাম্প প্ৰশাসনে ভাৰতৰ পৰা আমদানি কৰা সামগ্ৰীৰ ওপৰত আৰোপ কৰা অতিৰিক্ত ২৫ শতাংশ শুল্ক কাৰ্যকৰী হলেই ভাৰতীয় সামগ্ৰীৰ ওপৰত মুঠ শুল্ক ৫০ শতাংশলৈ বৃদ্ধি পাব। ৰাছিয়াৰ পৰা তেল ক্ৰয় কৰাৰ বাবে ভাৰতক শাস্তি দিয়াৰ উদ্দেশ্যে ট্ৰাম্প প্ৰশাসনে এই সিদ্ধান্ত গ্ৰহণ কৰিছিল। ট্ৰাম্প প্ৰশাসনে ইতিমধ্যে এই সন্দৰ্ভত খচৰা নিৰ্দেশনা প্ৰকাশ কৰিছে,।
এই নিৰ্দেশনাত কোৱা হৈছে যে ভাৰতে ৰাছিয়াৰ পৰা প্ৰত্যক্ষ বা পৰোক্ষভাৱে তেল ক্ৰয় কৰি ৰাছিয়াৰ অৰ্থনীতিক সহায় কৰিছে, যাৰ ফলত এই অতিৰিক্ত শুল্কৰ প্ৰয়োজন হৈছে। এই শুল্ক নিৰ্ধাৰিত সময়ৰ পিছত আমেৰিকাৰ বজাৰত প্ৰৱেশ কৰা বা গুদামৰ পৰা ওলোৱা ভাৰতীয় সামগ্ৰীৰ ওপৰত প্ৰযোজ্য হ’ব। ভাৰতীয় সময় অনুসৰি ২৭ আগষ্ট তাৰিখে পুৱা ৯:৩১ বজাৰ পৰা এই শুল্ক কাৰ্যকৰী হ’ব।
